काठमाडौँ। पश्चिम किनार (West Bank) को हेब्रोन शहर नजिकै दुई इजरायली सैनिकको ज्यान जाने गरी भएको आक्रमणपछि इजरायली सेनाले प्यालेस्टिनी भवनहरू भत्काउन सुरु गरेको छ। घटनापछि इजरायली प्रधानमन्त्री बेन्जामिन नेतान्याहुले कब्जा गरिएको पश्चिम किनारमा ‘व्यापक सैन्य कारबाही’ का लागि इजरायल तयार रहेको चेतावनी दिएका छन्।
हेब्रोन बाहिरको एक सैन्य चेकपोइन्टमा दुई प्यालेस्टिनी बन्दुकधारीले चलाएको गोलीबाट दुई सैनिकको मृत्यु हुनुका साथै अन्य तीन जना घाइते भएका थिए। इजरायली सुरक्षा बलको जवाफी कारबाहीमा दुवै आक्रमणकारी घटनास्थलमै मारिएका छन्।
घटनालगत्तै आक्रमणस्थलको निरीक्षण गर्दै प्रधानमन्त्री नेतान्याहुले आक्रमणकारी आएको हेब्रोनको छिमेकी बस्तीलाई सेनाले “पूर्ण रूपमा ध्वस्त पार्ने र त्यसको स्वरूप परिवर्तन गरिदिने” बताएका छन्। सुरक्षा निकायका अनुसार करिब २ लाख जनसङ्ख्या रहेको हेब्रोन र नजिकैको हालहुल शहरलाई सेनाले घेराबन्दी (Cordon) गरेको छ।
इजरायली सेनाका अनुसार आक्रमणकारीको गाडीबाट ठूलो मात्रामा हातहतियार तथा गोलाबारुद बरामद गरिएको छ। उनीहरूले नजिकैको ‘रुट ३५’ मा ठूलो स्तरको आक्रमण गर्ने योजना बनाएको तर चेकपोइन्टमा अचानक सैनिकहरूसँग जम्काभेट भएपछि सोही स्थानमा गोली चलाएको सेनाको दाबी छ।
अन्तर्राष्ट्रिय समाचार संस्था बीबीसीका अनुसार भिडियो फुटेजमा सैनिक र बन्दुकधारीहरूबीच तीव्र गोलीहानहान भएको र कारबाट ओर्लिएका दुई जनाले पेस्तोल तथा असाल्ट राइफलबाट आक्रमण गरेको देखिएको छ।
आक्रमणमा संलग्न संदिग्ध प्यालेस्टिनीहरूका घर तथा पूर्वाधार भत्काउने इजरायली सेनाको कदमलाई मानवअधिकारवादी संस्थाहरूले ‘सामूहिक सजाय’ को संज्ञा दिँदै आलोचना गर्दै आएका छन्।
संयुक्त राष्ट्रसङ्घको तथ्याङ्क अनुसार यस वर्षको सुरुदेखि अहिलेसम्म पश्चिम किनारमा इजरायली सेना वा यहुदी बसोबासीहरूको आक्रमणबाट कम्तीमा ९६ जना प्यालेस्टिनीको मृत्यु भइसकेको छ। सोही अवधिमा प्यालेस्टिनीहरूको आक्रमणमा परी चार जना इजरायलीको ज्यान गएको छ। वार्षिक ओलिभ (जैतून) खेती भित्र्याउने समयमा यहुदी बसोबासी र प्यालेस्टिनीहरूबीच तनाव उच्च बिन्दुमा पुगेका बेला यो पछिल्लो घटना भएको हो।
