काठमाडौँ:
हालै नेपालमा आएको भीषण बाढी र पहिरोबाट ठूलो धनजनको क्षति झेलेको रसुवा जिल्लाको भोटेकोशी तटीय क्षेत्रसहित देशभरका प्रभावित नागरिक तथा परिवारको राहत र पुनःस्थापनाका लागि विदेशमा रहेका संघ-संस्थाहरूले सहयोगको हात बढाउने क्रम जारी छ। यसैक्रममा विदेशमा बसोबास गर्दै आएको ‘भुटानी गुरुङ कम्युनिटी’ (Bhutanese Gurung Community) ले रसुवाको भोटेकोशी लगायत देशका विभिन्न भागका बाढीपहिरोपीडितप्रति गहिरो सहानुभूति व्यक्त गर्दै आर्थिक सहयोग प्रदान गरेको छ।
उक्त संस्थाका तर्फबाट भीम राज गुरुङले नेपाल सरकारको ‘प्रधानमन्त्री दैवी प्रकोप उद्धार कोष’ (Prime Minister’s Disaster Relief Fund) मा रु.३०२३१७.४६ रुपैया हस्तान्तरण गर्नुभएको छ। सो रकम नेपाल क्लियरिङ हाउस लिमिटेड (NCHL) को इलेक्ट्रोनिक पेमेन्ट गेटवेमार्फत सिधै सरकारी कोषमा जम्मा गरिएको हो।
भोटेकोशी क्षेत्रमा परेको असर र सहयोगको महत्त्व
विशेष गरी रसुवागढी तथा भोटेकोशी नदी तटीय आसपासका बस्तीहरू लगातारको भारी वर्षा, पहिरो र नदीको तीव्र बहावले गर्दा गम्भीर रूपमा प्रभावित बनेका छन्। भोटेकोशीको कटान र पहिरोले गर्दा जनजीवन अस्तव्यस्त हुनुका साथै धेरै स्थानीय परिवारहरू विस्थापित हुनुपरेको छ। यस्तो कठिन परिस्थितिमा प्राप्त वैदेशिक सहयोगले भोटेकोशी क्षेत्रका विस्थापित परिवारहरूको तत्काल उद्धार, खाद्यान्न, अस्थायी आवास र पुनःस्थापनामा महत्वपूर्ण सहयोग पुग्ने विश्वास लिइएको छ।
शान्ति पूजा र सामाजिक सञ्जालमार्फत ऐक्यबद्धता
आर्थिक सहयोग हस्तान्तरणका साथै उक्त अवसरमा विपद्मा परी ज्यान गुमाएका मृतात्माको चिरशान्ति र प्रभावित क्षेत्रमा उत्पन्न संकट चाँडै समाधान होस् भन्ने कामना गर्दै भुटानी गुरुङ समुदायद्वारा विशेष शान्ति पूजा समेत आयोजना गरिएको थियो।
शान्ति पूजापश्चात् सामाजिक सञ्जालमार्फत ऐक्यबद्धता जनाउँदै उनीहरूले बाढीपहिरोमा परी ज्यान गुमाएका, घरबारविहीन भएका र प्रभावित भएका सम्पूर्ण नेपाली परिवारहरूप्रति भावपूर्ण प्रार्थना र समवेदना व्यक्त गरेका छन्।
“एउटा मैनबत्तीले अँध्यारो हटाउन सक्छ र सानो सहयोगले पनि ठूलो परिवर्तन ल्याउन सक्छ।”
उनीहरूले यो कठिन घडीमा भुटानी गुरुङ समुदाय सदैव नेपाल र नेपाली नागरिकको साथमा उभिने प्रतिबद्धता समेत व्यक्त गरेका छन्। सरकारी कोषमार्फत पठाइएको यो रकम पारदर्शी रूपमा रसुवाको भोटेकोशी क्षेत्रसहितका अति प्रभावित बस्तीहरूसम्म छिटोभन्दा छिटो पुग्ने अपेक्षा गरिएको छ।
