काठमाडौँ। नेपाल सुनचाँदी रत्न तथा आभूषण महासङ्घका महासचिव निरबहादुर विश्वकर्मा ‘विमल धमला’ले नेपाली कांग्रेसको आगामी १५ औँ महाधिवेशनमा केन्द्रीय सदस्य पदमा उम्मेदवारी दिने घोषणा गरेका छन्। तीन दशकदेखि कांग्रेस राजनीतिमा निरन्तर सक्रिय धमलाले दलित क्लस्टरबाट केन्द्रीय सदस्यमा आफ्नो उम्मेदवारी प्रस्तुत गर्न लागेका हुन्।
धमला कांग्रेसको १३ औँ, १४ औँ र १५ औँ महाधिवेशनमा लगातार महाधिवेशन प्रतिनिधि निर्वाचित भइसकेका छन्। यसअघि नेपाल राष्ट्रिय दलित समाज कल्याण सङ्घ पाँचथर शाखाको तीन कार्यकाल केन्द्रीय सदस्य तथा नेपाल दलित सङ्घको जिल्ला सचिवको जिम्मेवारी सम्हालिसकेका उनी हाल नेपाल दलित सङ्घको आमन्त्रित केन्द्रीय सदस्य छन्। साथै, उनी २०७६ सालको राष्ट्रिय सभा सदस्य निर्वाचनमा कोशी प्रदेशबाट नेपाली कांग्रेसको तर्फबाट उम्मेदवार बनेका थिए।
व्यावसायिक रूपमा सुनचाँदी व्यवसायीहरूको हकहितका लागि सक्रिय रहँदै आएका धमलाले पार्टीको संस्थागत आधारलाई थप सुदृढ बनाउन उम्मेदवारी दिन लागेको बताएका छन्। “कांग्रेस अब पहिलेको जस्तो रहँदैन। पार्टीलाई नयाँ ढङ्गले बलियो बनाउन र दलित तथा उत्पीडित समुदायको आवाजलाई केन्द्रीय तहमा प्रभावकारी रूपमा उठाउन मेरो उम्मेदवारी रहनेछ,” उनले भने।
