२० असोज, २०८३ (६ अक्टोबर, २०२६)
काठमाडौँ। नेपाली कांग्रेसको जारी १५औँ महाधिवेशन अन्तर्गत नयाँ कार्यसमिति चयनका क्रममा नेत्री पुष्पा भुसाल महिलातर्फको उपसभापति पदमा निर्विरोध निर्वाचित हुनुभएको छ। केन्द्रीय निर्वाचन समितिले निर्धारण गरेको मङ्गलबार साँझ ७ बजेसम्मको निर्धारित समयसीमाभित्र महिला उपसभापति पदमा भुसालको मात्र एकल उम्मेदवारी परेकाले उहाँ निर्विरोध निर्वाचित हुनुभएको हो।
निर्वाचन समितिले भृकुटीमण्डपस्थित राष्ट्रिय सभागृहमा सञ्चालन गरिरहेको उम्मेदवारी दर्ता प्रक्रियाका क्रममा महिला उपसभापतिमा अन्य कसैको पनि दाबी नपरेको समितिले पुष्टि गरेको छ।
यसअघि गत पुसमा सम्पन्न भएको पार्टीको विशेष महाधिवेशनबाट पनि भुसाल उपसभापति पदमै चयन हुनुभएको थियो। १५औँ महाधिवेशनमा पुनः निर्विरोध निर्वाचित भएसँगै उहाँले कांग्रेसको केन्द्रीय पदाधिकारी तहमा आफ्नो बलियो उपस्थिति निरन्तर कायम राख्नुभएको छ।
