काठमाडौँ। नेपाली कम्युनिस्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहालले केही समयभित्रै मुलुकमा फेरि नयाँ राजनीतिक परिस्थिति निर्माण हुने दाबी गरेका छन्।
शनिबार पार्टी केन्द्रीय कार्यालय पेरिसडाँडामा आयोजित ‘पार्टी जागरण अभियान’ को औपचारिक उद्घाटन गर्दै संयोजक दाहालले तत्कालीन जनयुद्धको स्मरण गरे। निष्ठापूर्वक जनताका मुद्दा उठाउँदा जस्तोसुकै प्रतिकूलतामा पनि जनसमर्थन जुट्ने विश्वास व्यक्त गर्दै उनले प्रारम्भिक चरणको कठिन यात्राको समीक्षा समेत गरे।
शुरुवाती दिनमा सीमित संख्यामा रहेका कार्यकर्ताबाट सुरु भएको आन्दोलन कालान्तरमा लाखौँ जनताको समर्थनमा रूपान्तरण भई मुलुकमा ऐतिहासिक परिवर्तन सम्भव भएको उनले बताए।
सम्बोधनका क्रममा अध्यक्ष दाहालले इतिहासमा आफ्नो पार्टीले खेलेको भूमिका र विचारको महत्त्वलाई अवमूल्यन गर्न खोजिएको भन्दै असन्तुष्टि जनाए। वर्तमान राजनीतिक परिवेशमा माओवादी आन्दोलन र त्यसको ऐतिहासिक योगदानलाई कमजोर आँक्ने प्रवृत्ति बढेको उल्लेख गर्दै उनले परिवर्तनका संवाहकलाई उपेक्षा गर्ने प्रयास कहिल्यै सफल नहुने जिकिर गरे।
विचार, सिद्धान्त र बलिदानको जगलाई कसैले पनि सजिलै मेटाउन नसक्ने स्पष्ट पार्दै पूर्वप्रधानमन्त्री दाहालले पछिल्लो समय पार्टीप्रति भइरहेका विभिन्न टीकाटिप्पणी र आलोचनाप्रति संकेत गरे। उनले इतिहासलाई ‘माइनस’ गरेर अघि बढ्न नसकिने चेतावनी समेत दिए।
