काठमाडौँ: पाकिस्तानको ब्रड पिक हिमाल आरोहणका क्रममा निधन भएका कीर्तिमानी पर्वतारोही पुरबहादुर गुरुङ (युक्ता) प्रति अन्तिम श्रद्धाञ्जली अर्पण गरिएको छ।
शुक्रबार संस्कृति, पर्यटन तथा नागरिक उड्डयनमन्त्री खड्कराज पौडेल, गृहमन्त्री सुधन गुरुङ, नेपाली कांग्रेसका सभापति गगन थापा र सांसद इन्दिरा राना मगरलगायतका शीर्ष नेताहरूले स्वर्गीय गुरुङको पार्थिव शरीरमा श्रद्धाञ्जली व्यक्त गरे। श्रद्धाञ्जली सभामा नेपाल पर्वतारोहण संघका पदाधिकारी, आरोही, पर्यटन व्यवसायी, आफन्त तथा शुभचिन्तकहरूको बाक्लो उपस्थिति रहेको थियो।
पाकिस्तानको काराकोरम हिमशृंखलामा स्थित ब्रड पिक आरोहणका क्रममा आएको हिमपहिरोमा परी गुरुङसहित १० जना बेपत्ता भएका थिए। त्यसमध्ये गुरुङको पार्थिव शरीर बिहीबार काठमाडौँ ल्याइएको हो।
गोरखाको लाप्राक स्थायी घर भएका गुरुङ एक अनुभवी आरोही हुन्। उनले १० पटक सर्वोच्च शिखर सगरमाथाको सफल आरोहण गर्नुका साथै ८ हजार मिटरभन्दा अग्ला हिमालहरू २८ पटक सफल आरोहण गरिसकेका थिए।
