३ वैशाख, काठमाडौं । थाइल्याण्डस्थित नेपाली राजदूतावासको समन्वयमा कम्बोडियामा अवैध रूपमा बसिरहेका ४६ जना नेपाली नागरिकलाई उद्धार गरी स्वदेश फर्काइएको छ। दूतावासले ३० चैत र १ वैशाखमा उनीहरूलाई काठमाडौं पठाएको हो।
कसरी परेका थिए अलपत्र?
विभिन्न प्रलोभनमा परी कम्बोडिया पुगेका नेपालीहरूलाई त्यहाँका अवैध अनलाइन स्क्यामिङ्ग केन्द्र र क्यासिनोहरूमा जबरजस्ती ठगीजन्य कार्यमा संलग्न गराइएको पाइएको थियो। उद्धार गरिएका अधिकांश व्यक्तिहरू:
विभिन्न प्रलोभनमा परी गैरकानुनी बाटोबाट कम्बोडिया पुगेका।
बिनाभिसा वा भिसाको अवधि सकिएपछि पनि बसिरहेका।
गैरकानुनी काममा लगाइएका र अलपत्र परेका।
दूतावासले जारी गरेको विज्ञप्ति अनुसार, कम्बोडियामा अझै पनि केही नेपालीहरू अनलाइन ठगीलगायतका गैरकानुनी काममा फसेको र भिसा अवधि सकिएर अलपत्र परेको जानकारी प्राप्त भएको छ। बाँकी रहेका अन्य नेपालीहरूलाई पनि स्वदेश फर्काउन आवश्यक पहल भइरहेको दूतावासले जनाएको छ।
