भदौ ३० काठमाण्डौँ । प्रधानमन्त्री प्रचण्डले सँयुक्त राष्ट्रसंघको महासभामा गएर आफूले अन्तराष्ट्रिय समुदायलाई नेपालको शान्ति प्रकृयालाई टुंग्याउन सहयोग पुर्याउन अपील गर्ने बताएका छन् ।
आज पार्टी कार्यलयमा आयोजित पोष्ट बहादुर बोगटीको स्मृतिमा आयोजित कार्यक्रममा प्रधानमन्त्री प्रचण्डले नेपालको शान्ति प्रकृया विश्वकै लागि उदाहरणीय भएको भन्दै यसको बाँकी काम टुंगो लगाउन सहयोगको अपील गर्नु पर्ने बताए ।
त्यसै गरी जलवायु परिवर्तनका कारण परेको असरले नेपाललाई मात्रै हैन भविष्यमा मानवजातिलाई नै संकट पर्ने अवस्था आउन सक्ने खतरा रहेको भन्दै त्यसका बारेमा पनि गंभीर रुपले ध्यानाकर्षित गर्न पनि आफू महासभामा जान लागेको उनले बताए ।
साथै ४७ वटा अति कम विकसित देशहरुको प्रतिनिधित्व गर्दै विकास र विकासको मोडलका बारेमा पनि ध्यानाकर्षित गर्नु पर्ने भएकाले पनि आफू त्यता जान लागेको प्रचण्डको भनाई छ ।
यसै गरी छिमेकी देश चीनको भ्रमणमा नयाँ नाका खोल्ने, कृषि, जडिबुटी, उर्जा, पूर्वाधार जस्ता विषयमा महत्वपूर्ण छलफल र समझदारी हुने पनि प्रधानमन्त्रीले विस्वास व्यक्त गरेका छन् । असोज ५ मा प्रधानमन्त्री न्यूयोर्कबाट चीन जाने छन् ।
