भदौ १२ काठमाण्डौँ । प्रधानमन्त्री एवं नेकपा माओवादी केन्द्रका अध्यक्ष प्रचण्डले माओवादी कमजोर बन्दा प्रतिकृयावादीहरुको हमला बढेको, परिवर्तन उल्ट्याउने र देशलाई दुर्घटनामा लैजाने खतरा रहेको भन्दै फेरी जनतालाई जागरुक पारेर आन्दोलनको रक्षा गर्नु पर्ने बताएका छन् ।
आज राष्ट्रिय सभामा उपत्यका बिशेष प्रदेशका कार्यकर्ताहरुलाई प्रशिक्षण दिँदै प्रधानमन्त्रीले अहिले आफू प्रधानमन्त्री भएर राम्रो काम गर्दा गर्दै पनि निरन्तर मुद्धा हाल्न थालिएको भन्दै जनयुद्धकालकै ३६ वटा मुद्धा अझै आफ्नो टाउकोमा रहेको खुलाए ।
पहिला जनयुद्ध शुरु गर्दा सानो टिमले गाँउ गाँउबाट शुरु गरेको भन्दै अहिलेको समाजवादी क्रान्तिको शुरुवात माथिबाट र खास गरी आफ्नो नेतृत्वमा सरकार र पार्टी सबै तिरबाट एउटा युद्धको शुरुवात भएको भन्दै मैदानमा उत्रन कार्यकर्तालाई अपील गरे ।
तीन महिने अभियानमा जनता, समर्थक मात्र हैन विरोधीको समेत घर घरमा पुगेर छलफल गर्न निर्देशन दिँदै प्रचण्डले तीन महिनापछि पार्टी शक्तिशाली हुने दावी गरे ।
प्रचण्डले माओवादी कमजोर हुँदा प्रतिकृयावादी सलबलाएको र टाउको निहुराएर हिँड्नु पर्ने जस्तो अवस्था बनेको भन्दै पार्टी जुर्मुराएपछि प्रतिकृयावादी सेलाउने दावी गरे । अहिलेको गठबन्धन पाँचै बर्ष टिक्ने विस्वास रहेको उनको भनाई छ ।
