साउन ३२ रामेछाप । प्रधानमन्त्री पुष्पकमल दाहाल प्रचण्डले आगामी तीन महिने अभियान पछि माओवादी फेरी जीवन्त पार्टी बन्ने र आगामी ८४ सालको चुनावमा ६४ मा जस्तै परिणाम ल्याउने बताएका छन् ।
रामेछापको दोरम्बा शैलुङ गाउँपालिकाको डाडाँकटेरीमा आयोजित २०औं दोरम्बा स्मृति दिवस कार्यक्रमलाई बिहीबार सम्बोधन गर्दै प्रधानमन्त्रीले सरकारमा गएपछि पार्टी र जनताको सम्बन्ध चिसिएको भन्दै अब अभियानले पार्टीलाई फेरी जनतासँग जोडेर समाजवादी क्रान्तिको वातावरण बनाउने विस्वास व्यक्त गरे ।
“आउने ३ महिनामा नयाँ एउटा वातावरण बन्छ, बन्छ । अर्को ३ महिनामा हाम्रो पार्टी जीवन्त पार्टीका रूपमा आउँछ । त्यसो भयो भने २०६४ को निर्वाचनको जस्तै परिणाम ल्याउन गाह्रो छैन ।’ प्रधानमन्त्रीले भने । मुलुकमा व्याप्त विकृति र विसंगतिको अन्त्य गर्न आफ्नो नेतृत्वको सरकार लागिरहेको पनि प्रधानमन्त्री प्रचण्डको दाबी छ ।
सरकारले ठूला आयोजना निर्माणमा ध्यान केन्द्रित गरेको उल्लेख गर्दै प्रधानमन्त्री दाहालले यस कार्यकालमा जनताको मन जित्ने गरी काम गर्ने पनि बताए । ‘यो पटक राम्रो काम गरेर जनताको मन जित्ने कामबाहेक अन्य कुनै काम गर्नु छैन,’ दाहालले भने, ‘जीवनको उत्तरार्द्धमा भए पनि राष्ट्र र जनताका निम्ति समाजवाद ल्याउनका लागि नयाँ संकल्पका साथ पहलकदमी लिन्छु ।’ एउटै जलविद्युत् आयोजना १० हजार मेगावाटसम्मका बनाउन सके मुलुकले आर्थिक समृद्धिको बाटो हिँड्न सक्ने प्रचण्डको धारणा छ ।
दाङको हापुरेमा सरकार र माओबादीबीच शान्ति वार्ता भइरहेको बेला २०६० साउन ३२ गते दोरम्बामा माओवादीका २१ जना नेता कार्यकर्ताको हत्या भएको थियो । कार्यक्रममा जनार्दन शर्मा सहित अन्य माओवादी नेताहरु सहभागी थिए ।
