साउन २९ काठमाण्डौँ । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सुन तस्करी प्रकरणको अनुसन्धानमा कुनै प्रकारको सम्झौता नहुने प्रस्ट पार्दै तथ्य र प्रमाणले भेटे जेल जान तयार हुन आफ्नै पार्टीका नेताहरुलाई भनेका छन् ।
पार्टी पदाधिकारी बैठकलाई सम्बोधन गर्दै प्रचण्डले सुनकाण्डमा संलग्न जोसुकै भए पनि नछाडिने प्रस्ट पारे । उनले आफ्नै पार्टीका नेताहरुको नामसमेत यो प्रकरणमा जोडिएकोतर्फ संकेत गर्दै कसुर गरेकै हो भने जेल जानका लागि तयार भएर बस्न चेतावनी दिए ।
उनले भने, ‘विपक्षीलाई जेल हाल्ने, आफ्नालाई बचाउने भन्ने होइन ।’ सुन तस्करी प्रकरणले पार्टीको तीन महिने अभियान नै प्रभावित हुने खतरा बढेको भन्दै उनले विपक्षीहरुले यसलाई मुद्दा बनाइरहेको पनि प्रस्ट पारे ।
सो अवसरमा पार्टीका नेता तथा गृहमन्त्री नारायणकाजी श्रेष्ठले अनुसन्धानका क्रममा प्रष्ट प्रमाण भेटिए कार्बाही हुने तर सञ्चार माध्यमले लेखेका आधारमा मात्रै भने कार्बाही गर्न नमिल्ने बताए ।
यति चर्चापछि पार्टी उपाध्यक्ष कृष्ण बहादुर महराले आफू सुन तस्करीमा संलग्न नरहेको र अनुसन्धानमा सघाउन तयार रहेको भन्दै निवेदन बोकेर आफै सिआईबीमा जान तयार रहेको प्रष्टीकरण दिएका थिए ।
महरा बाबु छोरा नौ किलो सुन तस्करी गर्ने चीनीया व्यक्तिसँग सम्पर्कमा रहेको बताईन्छ ।
