नेपालगन्ज साउन १३ । नेकपा एमालेका अध्यक्ष केपी शर्मा ओलीले अघिल्लो निर्वाचनमा गठबन्धनलाई एक किलाको ढक र एमालेलाई क्वीन्टलको ढक भएको टिप्पणी गरेका थिए । गठबन्धन नगर्ने भन्दा भन्दै पनि राप्रपा, जसपा, परिवारदल जस्ता पार्टीसँग मिलेर चुनाव लडेको एमाले प्रमुख दल हुन सकेन ।
आगामी निर्वाचनमा भने एमालेको नीतिसँग मिल्ने दलहरुसँग चुनावमा सहकार्य हुन सक्ने ओलीले बताएका छन् ।
मुलुकमा एमालेबाहेक अर्को कुनै विकल्प नरहेको भन्दै उनले यस्तो बताएका हुन् ।
शनिबार नेपालगञ्जमा लुम्बिनी प्रदेशका निर्वाचित जनप्रतिनिधिहरूको प्रदेशस्तरीय भेला तथा प्रशिक्षण कार्यक्रमलाई सम्बोधन गर्दै अध्यक्ष ओलीले मुलुक बनाउने भिजन एमालेसँगमात्रै रहेको भन्दै मुलुकमा अर्को कुनै विकल्प नरहेको बताए।
ओलीले एमालेबाहेक देशलाई हेर्न र फेर्नसक्ने दृष्टिकोण अरु कुनै पार्टीसँग नरहेको प्रष्ट पारे। एमाले मिसन ८४ मा केन्द्रित रहेको भन्दै ओलीले यसलाई सफल बनाउँदै पार्टी बहुमत आउने गरी तयारी गर्न निर्देशन दिए।
उनले आगामी निर्वाचनमा एमालेले एक्लै बहुमत ल्याए पनि एमालेको नीतिहरूसँग सहमत हुने, विकासको अभियानलाई अघि बढाउन चाहने राजनीतिक शक्ति र व्यक्तिहरूलाई सँगै लिएर अघि बढ्ने बताए।
