चीनको चिनियाँ कम्युनिष्ट पार्टीका पोलिटब्यूरो सदस्य युआन च्या च्युन तीन दिने नेपाल भ्रमणका लागि आज काठमाडौँ आईपुगेका छन् । कोलम्बोबाट आएको श्रीलंकन एयरको जहाजमा युआन नेतृत्वको टोली पौने १२ बजे त्रिभुवन अन्तराष्ट्रिय विमानस्थलमा अवतरण गरेको थियो ।उनीहरुलाई नेकपा माओवादी केन्द्रका महासचिव देव गुरुङ र यहाँस्थित चिनियाँ राजदूत छ्न सोङ्गलेले विमानस्थलको विशिष्ट कक्षमा स्वागत गरेका छन् ।
तीन दिने राजनीतिक भ्रमणमा काठमाडौं आइपुगेको युआनसहितको भिआइपी टोली बत्तीसपुतलीस्थित होटल द्वारिकाजमा बस्नेछ । टोलीका अरु सदस्यको लागि म्यारियट होटलमा बस्ने प्रवन्ध मिलाइएको बताइएको छ ।
च्या नेतृत्वको प्रतिनिधिमण्डलले भ्रमणका क्रममा राष्ट्रपति रामचन्द्र पौडेलसँग आजै अपराह्न ३ बजे राष्ट्रपतिको कार्यालयमा शिष्टाचार भेटवार्ता गर्ने कार्यक्रम तय भएको छ ।
पोलिटब्यूरो सदस्य युआनले आजै सिंहदबारमा कार्यबाहक प्रधानमन्त्री एवं रक्षामन्त्री पूर्णबहादुर खड्कासँग र उपप्रधानमन्त्री एवं नेकपा (माओवादी केन्द्र) का कार्यबाहक अध्यक्ष नारायणकाजी श्रेष्ठसँग शिष्टाचार भेटवार्ता गर्नेछन् ।
च्याको भ्रमणको चाँजोपाँजो मिलाउन चीनको नेपाल मामिलाका कूटनीतिज्ञ शनिबार नै नेपाल आएकी थिईन् । च्या नेतृत्वको टोली श्रीलकाबाट सोझै नेपाल आएको हो ।
प्रधानमन्त्री प्रचण्डको चीन भ्रमण अघि चीनीया र नेपाली नेताहरुका भ्रमण आदान प्रदान तीव्र भएको छ ।
च्या नेतृत्वको टोलीले आजै साँझ माओवादी केन्द्रका पदाधीकारीहरुसँग समेत छलफल गर्ने तय भएको छ ।
