असार २५, काठमाडौँ । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले नैतिकता जीवित भए प्रधानमन्त्री पुष्पकमल दाहाल
प्रचण्डले राजीनामा दिनुपर्ने बताएका छन् । प्रतिनिधिसभा सदस्यसमेत रहेका अध्यक्ष लिङ्देनले सोमबार सदनमा आफ्ना कुरा राख्दै प्रधानमन्त्री दाहालको अभिव्यक्ति गम्भीर भएकाले राजीनामा दिनुपर्ने बताएका हुन् ।
असार २० गतेको बैठकमा आफूहरूलाई बोल्न नदिएकोमा गुनासो गर्दै अध्यक्ष लिङदेनले भने, प्रधानमन्त्रीको अभिव्यक्तिबारे प्रतिपक्षमा रहेका सबै दलले त्यसको विरोध गरेका थियौँ । तर त्यो दिन हामीलाई विचार राख्न किन दिइएन ? किन नियम मिचेर सत्तापक्षतिर बोल्न दिइयो । प्रधानमन्त्रीले नैतिकता जीवित छ भने राजीनामा दिनुपर्छ । दबाबले दिने होइन।
उनले तत्कालीन कानुनमन्त्री शेरबहादुर तामाङले ‘बोली चिप्लिँदा’ राजीनामा दिएको स्मरणसमेत गराए । साथै लिङ्देनले संसद्मा केही दल मात्र नभएको पनि बताए । अरु दल पनि निर्णायक अवस्थामा रहेकाले अरुको भारी आफूहरूले बोक्न नसक्ने उनको भनाइ छ ।
प्रधानमन्त्रीका प्रेस सल्लाहकारबाट मिटरब्याजसम्बन्धी अध्यादेश प्रतिपक्षी दलहरू विरोधमा छन् भन्ने भाष्य निर्माण गर्न खोजिएको पनि उनले बताए ।
