असार २३, काठमाडौँ । एकिकृत समाजवादीका महासचिव घनश्याम भुसालले संसद्को चौथो ठूलो दल राष्ट्रिय स्वतन्त्र पार्टीको हविगत छिट्टै नै पुराना दलहरूको जस्तै हुने दाबी गरेका छन् ।
एकीकृत समाजवादी निकट ‘समाजवादी पेशागत कानुन व्यवसायी संगठन’ले आज काठमाडौंमा आयोजना गरेको कार्यक्रममा बोल्दै महासचिव भुसालले दलाल पूँजीवादले मुलुकमा ल्याएको समस्या समाधान गर्ने बाटोमा कुनै कदम नचालेकाले नयाँ दलको रुपमा आएको रास्वपाको पनि छिट्टै पुरानै दलको जस्तो हविगत हुने बताएका हुन् ।
उनले भने, ‘अहिले राजनीतिक जुन नयाँ भन्ने चिज आइराख्या छ । स्वतन्त्र भन्ने जुन चिज आइराख्या छ, तिनको पनि त्यही हविगत हुन्छ । किनभने ती कसैले पनि यो दलाल, पूँजीवादमाथि प्रश्न उठाएका छैनन्, सुशासनको कुरा उठाएका छैनन्, जसले रोजगारी सृजना हुन्छ । हाम्रा बच्चाबच्चीहरुले नयाँ जिन्दगीका लागि रोजगारी पाउँछन । त्यो भन्दा राम्रो रोजगारी पाउँछन । यसतर्फ उनीहरुका पनि मुद्दा केन्द्रित छैनन् ।’
राजनीतिक दलहरूको काम दलाल पूजीवादले निम्त्याएका समस्या समाधान गर्दै राष्ट्रिय पुँजीको विकास गर्नु रहेको भुसालको भनाइ थियो ।
