असार २१, काठमाडौं । नेपालमा बसोबास गर्दै आएका तिब्बती समुदायले आज आफ्ना धार्मिक नेता दलाई लामाको ८८ औं जन्मदिन मनाएका छन्। तिब्बतबाट निर्वासित धार्मिक नेता लामा आजदेखि ८८ वर्ष पुगेका छन्। उनी १४ औं दलाई लामा हुन्।
लाजिम्पाटस्थित तिब्बती शरणार्थी कार्यालय (टिबेटिएन रेफ्युजी वेलफेयर अफिस)ले जन्मोत्सवको आयोजना गरेको हो। तिब्बती समुदायले काठमाडौंस्थित स्वयम्भुको नाम्गेल स्कूल परिसरमा एक कार्यक्रमको आयोजना गरी धार्मिक नेता दलाई लामाको जन्मदिन मनाए ।
तिब्बती समुदायले तिब्बती परम्पराअनुसार दलाई लामाको तस्बिरमा पूजाअर्चना गरी दीर्घायुको कामना गरेका थिए।
विशेष समारोहमा नेपालस्थित अमेरिकी, जापान, फान्स, युरोपियन युनियनलगायतका विदेशी कूटनीतिज्ञ सहभागी भएका छन्। अघिल्लो वर्ष उनीहरुले जाउलाखेलको खुला चउरमा कार्यक्रम गरेका थिए।
राजनीतिक अभिप्रायले नभई धार्मिक आस्थाअनुसार आफ्ना धार्मिक नेता लामाको जन्मोत्सव मनाइएको तिब्बती शरणार्थी समुदायका अगुवाले दाबी गरेका छन्। विश्वभर छरिएका तिब्बतीले जुलाई ६ मा धार्मिक एवम् निर्वासित नेता लामाको जन्मदिन मनाउँदै आएका छन्।
