काठमाडौं । प्रधानमन्त्री पुष्पकमल दाहाल प्रचण्डले अहिलेको गठबन्धन पाँच वर्ष अगाडि जाने दावी गरेका छन् ।
धादिङको गजुरीमा आदर्श बहुमुखी क्याम्पसको भवन समुद्घाटनका क्रममा प्रधानमन्त्री प्रचण्डले मिडियामा सरकारको आयु बारे विभिन्न ठिप्पणी आएको भन्दै सत्तापक्ष र प्रतिपक्षसँगको पनि छलफलबाट आफू यो गठबन्धन पाँच वर्ष टिक्नेमा ढुक्क रहेको बताएका छन् ।
‘अहिले कता कता यो सरकारको आयु कति भनेर मिडियामा हुने नहुने चर्चा चल्ने गरेको छ । पाँच वर्ष यो गठबन्धन केहि हुनेवाला छैन, यही गठबन्धनको नेतृत्वमा देश विकासको युगतर्फ जानेछ ।’ उनले भने ।
भारत भ्रमणका क्रममा प्रधानमन्त्रीको हैसियतले आफूले राम्रो गरेको भएपनि राम्रो गरेको देखी नसहने नकारात्मक प्रवृति भएकाहरूले विरोध गरेको प्रधानमन्त्रीको भनाई थियो ।
१० वर्षमा दश हजार मेगावाट बिजुली बेच्ने, बंगलादेशमा बिजुली बेच्ने सहमति जस्ता थुप्रै विषयहरु भ्रमणका ऐतिहासिक उपलव्धि भएको उनको भनाई छ ।
आफूले देश र जनताको पक्षमा राम्रो गर्दै जाने बताउँदै उनले जनताका पक्षमा गरेका कामको जनताले नै फैसला गर्ने विश्वास समेत व्यक्त गरे ।
