काठमाडौं, असार ८ गते । प्रधानमन्त्री पुष्पकमल दाहाल ‘प्रचण्ड’ले विभिन्न बिक्री डिपोमा ७१ हजार मेट्रिक टन रासायनिक मल मौज्दात रहेको बताएका छन् ।
शुक्रबार प्रतिनिधि सभा बैठकमा सांसद अब्दुल खानको प्रश्नको जवाफ दिनुहुँदै प्रधानमन्त्री प्रचण्डले २०७९ साउन महिनादेखि हालसम्म तीन लाख ५१ हजार मेट्रिक टन रासायनिक मल आयात भएको जानकारी दिए ।
प्रधानमन्त्री प्रचण्डले अगाडी भने, ‘‘सुरुमा रासायनिक मलका लागि १५ अर्ब रुपियाँ विनियोजन भएप नि थप २३ अर्ब रुपियाँको स्रोत सुनिश्चित गरी मल आपूर्ति व्यवस्थालाई सुदृढ गरिएको छ । यसबाट सरकार किसानहरुका लागि रासायनिक मल उपलब्ध गराउन जिम्मेवार रहेको तथ्य प्रमाणित हुन्छ । मलको आयातमा सङ्घीय मन्त्रालयलाई जिम्मेवार बनाइएको छ भने वितरण कार्यमा प्रदेश र स्थानीय तहहरुलाई परिचालन गरिएको छ । मल वितरण प्रणालीलाई पारदर्शी बनाउन मल आपूर्ति र वितरणमा डिजिटल प्रणाली प्रयोगमा ल्याइएको कुरा पनि म जानकारी गराउन चाहन्छु ।’’
त्यस्तै, यही महिनाभित्र भारतको कलकत्ताबाट ४५ हजार मेट्रिक टन डिएपी मल ल्याइने पनि उनले जानकारी दिए । प्रधानमन्त्रीले भने, ‘‘रासायनिक मलको आपूर्ति व्यवस्था विगतका वर्षहरुमा भन्दा सुदृढ भएको जानकारी गराउन चाहन्छु । २०७९ साउन महिनादेखि हालसम्म तीन लाख ५१ हजार मेट्रिक टन रासायनिक मल आयात भएको छ ।
यसै गरी प्रधानमन्त्रीले निजगढ अन्तराष्ट्रिय विमानस्थल निर्माणमा जोड दिईरहेको भन्दै यस वर्ष साईट क्लियरेन्सको काम सक्ने जानकारी दिए ।
यसै गरी सांसद अजेय चौरासियाले मधेशमा बजेट कम छुट्याईएको भनी गरेको प्रश्नको जवाफ दिने क्रममा मधेशमा बजेट कम परेको कुरा साँचो नभएको भन्दै , पूर्व पश्चिम राजमार्ग, काठमाण्डौँ तराई द्रुत मार्ग, नारायणी अस्पताल, हुलाकी राजमार्ग , औद्योगिक ग्राम जस्ता योजना र परियोजनामा ठूलो रकम विनियोजन भएको बताए ।
यसै गरी पूर्वी पहाडी जिल्लामा बाढी पहिरोबाट भएको सबै क्षतिको प्रत्यक्ष अवलोकन गर्न नसकेको भन्दै प्रधानमन्त्रीले विकास निर्माणको काम शुरु गर्दा भौगोलिक अवस्थितिको अध्ययन गरेर मात्रै थाल्नु पर्ने बताए ।
