असार ४ काठमाण्डौँ । प्रधानमन्त्री प्रचण्डको पहलमा प्रगतिशील र समाजवादी शक्तिहरूको गठबन्धन समाजवादी मोर्चा आज घोषणा गरिँदै छ। आज अपराह्न ४ बजे राष्ट्रिय सभा गृहमा कार्यक्रम आयोजना गरी समाजवादी मोर्चा घोषणा गरिने भएको हो।
यस मोर्चामा माओवादी केन्द्र, नेकपा एकीकृत समाजवादी, जसपा, नेपाल समाजवादी पार्टी र नेपाल समाजवादी पार्टी सहभागी हुने माओवादी महासचिव देव गुरुङले जानकारी दिए ।
मोर्चाको नाम ‘समाजवादी मोर्चा नेपाल’ राखिने छ।
नेताहरूका अनुसार मस्यौदामा समाजवादी मोर्चा नेपाललाई अंग्रेजीमा ‘सोसलिस्ट फ्रन्ट नेपाल’ भनिएको छ। आलोपालो अध्यक्षको व्यवस्था प्रस्ताव गरिएको छ। तोकिएको व्यक्ति र तोकिएको संख्या रहने उल्लेख गरिएको छ। दलहरूका सदस्यताका आधारमा सो संख्या राखिएको छ। ७५३ वटै स्थानीय तहसम्म पुग्नेगरी मोर्चाको संयन्त्र बनाइएको छ।
देशमा हालसम्म प्राप्त संघीय लोकतान्त्रिक गणतन्त्र लगायतका उपलब्धिहरूको रक्षा गर्दै समाजलाई निरन्तर अग्रगमनको दिशामा लैजान , देशलाई आर्थिक सामाजिक र सांस्कृतिक रुपान्तरण गर्ने मोर्चाको प्रतिवद्धता रहेको उनीहरुले बताएका छन् ।
