काठमाडौँ । प्रधानमन्त्री पुष्पकमल दाहाल ‘प्रचण्ड’ ले नेपाल आफैमा सुनको कचौरा जस्तो भएपनि अरुसँग भिख माग्दै हिँड्ने गरेको टिप्पणी गरेका छन् ।
पार्टीको रिटर्नी सेन्टर नेपालको प्रथम राष्ट्रिय भेलालाई काठमाडौँमा सम्बोधन गर्दै प्रचण्डले देशमै प्रचुर सम्भावना भएपनि विदेशीसँग भिख माग्नु दुःखद भएको बताएका हुन् ।
“प्रकृतिले दिएको कुरा भन्ने हो भने तराई मधेसदेखि पहाड, हिमालसम्म विविधता त्यसको उत्पादकत्व र स्रोतहरूको दृष्टिकोणले धेरै धनी छौँ । तपाईँहरूले सुन्नु भएको होला विदेशका कयौँ बौद्धिक अर्थशास्त्रीहरूले नेपाल सुनको कचौरा लिएर भिख मागेर हिँडेको छ भन्ने गर्छन् । नेपाल आफैमा सुनको कचौरा जस्तो छ ” । प्रचण्डले भने, ‘हामी दुनियाभरि रोजी रोटीको निम्ति जान बाध्य छौँ । सरकार दुनियाँभर आर्थिक सहयोगको भिख माग्ने अवस्था छ । यो एउटा विडम्बना हो । नेपाल र नेपालीका निम्ति दुर्भाग्यको कुरा हो ।’
हाम्रो इतिहास र विरासत यस्तो होइन’ प्रचण्डले भने, ‘अरू ठुला देशहरू वैदेशिक हस्तक्षेपको बुटमुनी कुल्चिदा हामी स्वतन्त्र भएको इतिहास छ । वीरता र बलिदानको दृष्टिकोणले हेर्ने हो भने नेपालीहरू विश्वभर ख्याति कमाएका हौँ ।’
उनले अब सबैले सोच्नु पर्ने समय आएको र समृद्धिका लागि सबै एकतावद्ध भएर जानु पर्ने आवस्यकता रहेको बताए ।
प्रधानमन्त्रीले वैदेशिक रोजगारीबाट युवाहरुले विभिन्न ठक्कर, हण्डर खाँदै सकारात्मक नकारात्मक अनुभव सहित नेपाल आएका युवाहरु नयाँ रुपले संगठित भएकोमा बधाई दिए ।
युवाहरुले अघि सारेको उदेश्य देश निर्माणको, देश भक्तिको र देशको अर्थतन्त्र निर्माणको निम्ती सन्देश जाने भन्दै रिटर्नी नेपाललाई धन्यवाद दिए ।
