२७ वैशाख, काठमाडौं। नक्कली भुटानी शरणार्थी प्रकरणमा भईरहेको प्रहरी अनुसन्धानमा कुनै प्रकारको हस्तक्षेप, अबरोध नगर्ने तीन दलका शिर्ष नेताबीच सहमती भएको छ ।
सिंहदरबारमा बुधबार भएको तीन दलको बैठकमा प्रहरी अनुसन्धानमा डिस्टर्ब गर्नुहुन्न भन्ने सहमती भएको हो । बैठकपछि प्रधानमन्त्री पुष्पकमल दाहाल प्रचण्डले भुटानी शरणार्थी प्रकरणमा थालेको प्रहरीको अनुसन्धानमा डिस्टर्ब गर्न नहुने तीन दलमा सहमती भएको जानकारी दिए ।
उनले भने, ‘हामीले स्पष्ट भाषामा भनेका छौं । दोषी नछुटून् र निर्दोष नपरून्। प्रहरीले आफ्नो काम गरिरहेको छ । जे भइरहेको छ नियम र विधि पद्धतिअनुसार काम भइरहेको छ । प्रहरीको अनुसन्धानमा कुनै डिस्टर्ब गर्नुहुन्न भन्नेमा हाम्रो सहमति भएको छ ।’
उनले मिडियामा प्रचार भएजसरी तीन दलका शीर्ष नेताहरुको भेट नभएको उनको भनाइ छ। उनले सदन कसरी अगाडी बढाउने समितिहरु कसरी बनाउने विषयमा छलफल मात्रै भएको बताए ।
उनले भने, ‘ मिडियामा प्रचार भएजसरी तीन जनाको भेट भएको होइन । सदन कसरी अगाडि बढाउने, समितिहरू कसरी बनाउने भन्नेबारे छलफल भएको हो । आशंका गर्नुपर्ने कारण छैन ।’ अहिलेको प्रहरी अनुसन्धान प्रक्रियामा भने कसैले डिस्टर्व नगर्ने सहमती भएको बताए ।
