वैशाख २६, काठमाडौँ । सांसद दुर्गा राईले संसद्लाई मर्यादित बनाउनुपर्ने भन्दै ध्यानाकर्षण गराएकी छन् । मंगलबारको प्रतिनिधिसभा बैठकको शून्य समयमा बोल्दै माओवादीकी सांसद राईले केही सांसदहरूले सदनको मर्यादा नराखेको र सदनको दुरुपयोग गरिरहेको भन्दै आपत्ति जनाएकी थिइन् ।
यसअघि अमरेश कुमार सिंह लगायतका सांसदहरूले संसद्मा प्रस्तुत गरेका शैलीप्रति लक्षित गर्दै उनले भनिन्, केही माननीयहरूले सदनको दुरुपयोग गर्नुभएको छ । संसद्मा कोही नांगिएर परेड खेल्ने, कोही मौन धारणा गर्ने । म सदनलाई मर्यादित बनाउन सभामुखमार्फत् ध्यानाकर्षण गराउन चाहान्छु । संसद्मा सांसदहरू मर्यादित नबन्दा आम नागरिक, सदन, सरकार र आफैं पनि अमर्यादित हुने हेक्का राख्नुपर्छ ।
सोमबार मात्रै स्वतन्त्र सांसद अमरेश कुमार सिंह संसद्मै कपडा खोलेर अर्धनग्न बनेपछि उनी आलोचित बनेका थिए । सांसद राईले उनै सिंहप्रति लक्षित गर्दै कटाक्ष गरेकी छन् । यसवाहेक केही साताअघि रास्वपाका सांसद हरि ढकालले शून्य समयमा मौन धारणा गरेका थिए ।
