वैशाख २५, काठमाडौं । स्वतन्त्र सांसद अमरेशकुमार सिंहले आफ्नो लागि सदन नै निर्बस्त्र रहेको प्रतिकृया दिएका छन् ।
संघीय संसद भवन नयाँ बानेश्वरमा पत्रकारहरुसँग कुरा गर्दै उनले आफूले प्रचारबाजीका लागि मात्र प्रतिनिधिसभा बैठकमा कपडा नखोलेको प्रष्टीकरण दिएका हुन् ।
आफ्नो लागि सदन निर्बस्त्र भएको, जनताको लागि सदन निर्बस्त्र भएकाले आफूले त्यसको विरोधका लागि कपडा खोलेको सिंहको जवाफ छ ।उनले भने, ‘मैले भ्रष्टाचारको बिषयमा कुरा राख्न खोज्दा समय नै पाईन, मेरो लागि सदन निर्बस्त्र छ, त्यसैले कपडा खोलेको हुँ ।’
भ्रष्टाचारको विषयमा संसदमा बोल्नका लागि सभामुखसँग आकस्मिक समय मागेको र समय नपाए हदैसम्मको विरोध गर्ने बैठक अगावै सभामुखलाई जानकारी गराएको उनले बताए ।
उनले भने, ‘सभामुखलाई आग्रह गरेँ । आकस्मिक समयमा भ्रष्टाचारको विषयमा बोल्छु । दुई मिनेट पाउने हो त्यो समय पाउँ’ उनले पत्रकारहरुसित भने, ‘उहाँ (सभामुख)लाई पहिल्यै भनेको थिएँ समय नपाए म प्रोटेस्टको अन्तिम लेबलसम्म जान्छु । शब्दमै भनेको थिएँ कपडा खोल्छु ।’
सोमबार प्रतिनिधिसभाको आकस्मिक समयमा बोल्न समय मागेका सांसद सिंहले समय नपाएपछि कपडा खोलेर विरोध जनाएका थिए ।
