काठमाडौँ बैशाख २४ । प्रधानमन्त्री पुष्पकमल दाहाल प्रचण्डले नक्कली भुटानी शरणार्थी प्रकरणका दोषी कोही पनि नछुट्ने बताएका छन् । उनले निर्दोष भने नफस्ने बताएका हुन् ।
प्रतिनिधिसभाको बजेट अधिवेशनको पहिलो बैठकपछि संसद् भवन बाहिर सञ्चारकर्मीहरूलाई प्रतिक्रिया दिँदै प्रधानमन्त्री दाहालले उक्त प्रकरणमा कसैले दबाब दिएर केही नहुने बताए ।
प्रतिनिधिसभा बैठकमा नक्कली भुटानी शरणार्थी प्रकरणबारे सत्तापक्ष र प्रतिपक्षका सांसदहरूले जोडतोडका साथ बहस गरेपछि प्रधानमन्त्री दाहालको उक्त धारणा आएको हो ।
‘मैले भनेको छु दोषी कोही बच्न सक्दैन, निर्दोष कोही पनि पर्दैन । सरकारको त्यही जोड छ । आज जसरी विषय उठेको छ, त्यसले अझ सरकारको मनोबल बढाउने काम नै गरेको छ भन्ने मैले ठानेको छु । कसैले त्यहाँ दबाब दिएर केही हुनेवाला छैन,’ प्रधानमन्त्री दाहालले भने ।
प्रधानमन्त्रीले पटक पटक कसैको दबाबले यो प्रकरणमा छानविन र अनुसन्धान नरोकिने स्पष्ट पारेका छन् ।
