बैशाख २३ काठमाण्डौँ । नक्कली भुटानी शरणार्थी प्रकरणमा संलग्नता देखिएपछि पक्राउ पूर्जी जारी भए लगत्तै फरार रहेका एमाले सचिव एवं पूर्व उपप्रधान एवं गृहमन्त्री टोप बहादुर रायमाझीको विषयमा छलफल गर्न एमाले अध्यक्ष केपी ओली दोस्रो पटक प्रधानमन्त्री भेट्न सिंहदरबार गएका छन् ।
१२ बजे सिंहदरबार पुगेका ओली र प्रधानमन्त्री प्रचण्डबीच कुराकानी भईरहेको छ । यस अघि पनि दुई नेताबीच कुराकानी भएको थियो ।
ओलीले यसअघि वैशाख २१ गते प्रधानमन्त्री दाहाललाई भेटेर पूर्वउपप्रधानमन्त्री तथा सांसद रायमाझीलाई बाटोबाटै हत्कडी लगाउन नहुने बताएका थिए ।
अर्घाखाँचीमै हुँदा पक्राउ पूर्जी जारी भएको सूचना पाएपछि रायमाझी सम्पर्क विहीन भएका छन् । रायमाझीका छोरा सन्दीप पक्राउ परीसकेका छन् । सन्दीपको नाममा डेढ करोड रुपैया नवील बैंकको चेक काटिएको फेला परेको थियो ।
एमालेमै रहेका पूर्व गृहमन्त्री बादलका सुरक्षा सल्लाहकार डा. ईन्द्रजीत राई पनि पक्राउ परिसकेका छन् । बादलका छोरा प्रतीक लुकिछिपि बसिरहेका छन् । राईका छोरा निरज पनि भागेका छन् । उनीहरुको खोजीलाई प्रहरीले तीव्रता दिएको छ ।
