बैशाख १० चितवन । उपनिर्वाचन अन्तर्गत चितवनको भरतपुर महानगरपालिका–११ स्थित नयाँकिरण माविमा तनाव भएपछि मतदान रोकिएको छ । सभापति रवि लामिछाने आएपछि राष्ट्रिय स्वतन्त्र पार्टीका कार्यकर्ताले उनको पक्षमा नाराबाजी गर्दै मतदानस्थल तर्फ गएपछि अन्य दलका कार्यकर्ताले बिरोध गरेका थिए । सो क्रममा धकेलाधकेल हुँदा कुटाकुट समेत भएको थियो । त्यसपछि भीडलाई नियन्त्रणमा लिन प्रहरीले लाठी चार्ज गरेको थियो ।
झडपको अवस्था आएपछि नाराबाजीमा संलग्न रास्वपाका समर्थकलाई प्रहरीले लाठीचार्ज गर्दै लखेटेको थियो। आफूहरुलाई तीन घण्टादेखि लाइनमा उभ्याइएको भन्दै मतदाताले आन्दोलन थालेका हुन्।
त्यहाँ एमालेका कार्यकर्ताहरुले रास्वपा सभापति रवि लामिछानेले माफी मागेपछि मात्रै मतदान अघि बढ्ने अडान लिइरहेका छन्। विवादपछि मतदानस्थलबाहिर सेनाको थप टोली पनि पुगेको छ। मतदानस्थल क्षेत्रमा अहिले सेना, सशस्त्र प्रहरी र जनपथ प्रहरीको पनि टोली तैनाथ भएको छ।
