चैत्र २१ काठमाडौँ । सत्ता गठबन्धनका पाँच राजनीतिक दलले आफ्ना आधिकारिक उम्मेदवारलाई जिताउन आग्रह गरेका छन् । आज शीर्ष नेताहरूले संयुक्त विज्ञप्ति जारी गर्दै वैशाख १० गते हुने उपनिर्वाचनमा गठबन्धनका उम्मेदवारहरुलाई जिताउन आह्वान गरेका हुन् ।
प्रतिनिधिसभा सदस्य उपनिर्वाचनका लागि गठबन्धन दलबाट तनहुँ १मा कांग्रेसका गोविन्द भट्टराई, चितवन- २ मा जीतनारायण श्रेष्ठ र बारा-२ मा जनता समाजवादी पार्टीका उपेन्द्र यादवले उम्मेदवारी दर्ता गरेका छन् । उनीहरुलाई नै जिताउन गठबन्धनले अपील गरेका छन् ।
गठबन्धन दलका आधिकारिक उम्मेदवारलाई विजयी गराई निर्वाचनलाई परिणाममुखी बनाउन गठबन्धन दलका पार्टी पंक्ति एकीकृतरुपमा परिचालित हुन आवश्यक छ, विज्ञप्तिमा भनिएको छ ।
प्रधानमन्त्रीरहेका माओवादी केन्द्रका अध्यक्ष पुष्पकमल दाहाल, कांग्रेस सभापति शेरबहादुर देउवा, एकीकृत समाजवादीका अध्यक्ष माधवकुमार नेपाल, जसपा अध्यक्ष उपेन्द्र यादव, लोकतान्त्रिक समाजवादी पार्टी अध्यक्ष महन्थ ठाकुरले विज्ञप्ति जारी गरेका हुन् ।
