काठमाडौँ चैत्र ३ । उपराष्ट्रपति पदको निर्वाचनका लागि आज मतदान हुँदै छ । उपराष्ट्रपतिका लागि गठबन्धनबाट राम सहाय प्रसाद यादव, एमालेबाट अष्टलक्ष्मी शाक्य र जनमत पार्टीकी ममता झा उम्मेद्धार रहेकी छन् ।
नयाँ बानेश्वरस्थित सङ्घीय संसद् भवनको ल्होत्से हलमा हुने मतदानका लागि सम्पूर्ण तयारी पूरा भएको निर्वाचन आयोगले जनाएको छ । बिहान १० देखि अपराह्न ३ बजेसम्म हुने मतदानमा सङ्घीय संसद्का सदस्य र प्रदेशसभा सदस्यका लागि बेग्ला बेग्लै मतदान केन्द्र तय गरिएको छ ।
उपराष्ट्रपति निर्वाचनमा मतदाताले मतपत्रमा उम्मेदवारको तस्बिर र नाम अङ्कित रहेको कोठामा स्वस्तिक छाप लगाई मतसङ्केत गर्नुपर्नेछ । सङ्घीय संसद् सदस्यको मतभार ७९ र प्रदेशसा सदस्यको मतभार ४८ कायम रहेको छ । निर्वाचनमा संघीय संसद्का तीन सय ३२ र प्रदेशसभाका ५ सय ५० सांसद मतदाता रहेका छन् । मतदान सम्पन्न भएलगत्तै मतगणना सुरु भई परिणाम आजै आउनेछ ।
उपराष्ट्रपतिको पदावधि पाँच वर्षको हुनेछ । मुलुकमा उपराष्ट्रपतिको यो तेस्रो निर्वाचन हुन लागेको हो ।
यस अघि गठबन्धनका तर्फबाट राष्ट्रपतिमा रामचन्द्र पौडेल निर्वाचित भईसकेका छन् ।
