काठमाडौं, फागुन २९ गते । उपराष्ट्रपति निर्वाचनका लागि उम्मेदवार दिनुभएको जनता समाजवादी पार्टी (जसपा) का सांसद प्रमिला कुमारीले आफ्नो उम्मेदवारी फिर्ता लिएकी छन् ।
सांसद प्रमिलाले पार्टीकै नेता रामसहाय प्रसाद यादवलाई समर्थन गर्दै आफ्नो उम्मेदवारी फिर्ताको स्वघोषणा गरेकी हुन् ।
सांसद प्रमिलाले ‘‘गठबन्धनका तर्फबाट साझा उम्मेदवार हुनुभएका पूर्वमन्त्री जसपा, नेपाल केन्द्रीय कार्यकारिणी समिति सदस्य तथा प्रतिनिधिसभा सदस्य रामसहाय प्रसाद यादव नेपालको निरङ्कुश शासन प्रणालीका विरुद्ध लोकतन्त्र स्थापनका लागि त्याग र सङ्घर्ष गर्नुभएको अग्रज नेता भएकाले उपराष्ट्रपतिमा जिताउन अपील गरेकी छन् ।
सांसद प्रमिलाले यादव राजनीतिक, आर्थिक र सामाजिक–सांस्कृतिक रूपले समाजको अग्रगामी रूपान्तरण र परिवर्तनको सङ्घर्ष सँगै शोषण, उत्पीडन, असमानता र विभेदका विरुद्ध जनआन्दोलन, ऐतिहासिक मधेश जनविद्रोह लगायत लोकतन्त्र बहालिका लागि पटक–पटक भएका विभिन्न आन्दोलनहरूमा नेतृत्वदायी भूमिका निर्वाह गरेको भन्दै आफूपछि हटेको जानकारी दिए ।
उपराष्ट्रपतिमा एमालेबाट अष्टलक्ष्मी शाक्य र गठबन्धनबाट राम सहाय प्रसाद यादवबीच प्रतिस्पर्धा छ । त्यस बाहेक प्रमिला यादव र ममता झाको समेत उम्मेद्धारी कायम रहेको छ ।
आगामी चैत्र ३ गते उपराष्ट्रपतिको निर्वाचन हुँदैछ । यस अघि फागुण २५ मा भएको राष्ट्रपतिको निर्वाचनमा गठबन्धनका रामचन्द्र पौडेल निर्वाचित भएका थिए ।
