फागुण २१ काठमाण्डौँ । प्रधानमन्त्री पुष्पकमल दाहाल ‘प्रचण्ड’ले सबै विभाजित माओवादीहरु एक हुने समय आएको बताएका छन् । जनयुद्धका सहिद तथा वेपत्ता सन्तती फाउन्डेसनले आयोजना गरेको कार्यक्रममा बोल्दै प्रचण्डले समयले सबै माओवादीहरुलाई एक ठाउँमा बनाउन थालेको बताएका हुन् ।
‘मैले पटक पटक, चाहे जनयुद्ध दिवसका दिन होस् । चाहे सहिद दिवसको दिनको कुरा होस् । जनयुद्धको पहिलो सहिद दिलबहादुर रम्तेलको सन्दर्भमा गोरखामा गएर अपिल गरेँ । अब समय आएको छ, सबै माओवादीहरु एक ठाउँमा केन्द्रीत हुन जरुरी छ’ प्रचण्डले भने, ‘माओवादी आन्दोलन ठूलो प्रवाहको रुपमा अगाडि आयो । शान्ति प्रक्रियामा आएपछि विभिन्न भंगालाहरुको रुपमा विभाजित भयो । अब समय बग्दै जाँदा ती सबै भंगालाहरु मिसिएर एउटा विशाल सागर बन्ने दिशातिर जाने समय आयो ।’
सबै विभाजित माओवादी नेताहरुले पाएको शिक्षालाई आफ्नो सम्पत्ति सम्झेर एकता गर्नुपर्ने प्रचण्डले बताए । बाबुराम, बैद्य, विप्लवले हाँसिल गरेको अनुभवहरु पनि रहेकाले अब नयाँ ढंगले सोच्नु पर्ने बताए ।
माओवादी शक्तिशाली भए मात्रै परिवर्तनका उपलब्धीलाई रक्षा गर्न सकिने प्रचण्डले बताए ।
यसै गरी सोही कार्यक्रममा बोल्दै नेपाल समाजवादी पार्टीका अध्यक्ष डा. बाबुराम भट्टराईले जनयुद्धलाई अपराधिकरण गर्ने प्रवृति बढेको भन्दै अब सबै माओवादी एक ठाँउमा आउनु पर्ने बताए ।
तत्काल एकता संभव नभए पनि सहकार्य र कार्यगत एकताको माध्यमबाट मिलेर अघि बढ्न उनले अपील गरे । उनले बहालवाला प्रधानमन्त्री बिरुद्ध मुद्धा हाल्नु जनयुद्धलाई जिस्क्याउनु भएको पनि चेतावनी दिए ।
