१९ फागुन, काठमाडौं । राष्ट्रपति निर्वाचनलाई लक्षित गरी आठ दलीय गठबन्धनले आज बागमती प्रदेशका सांसदहरुका लागि अभिमुखीकरण कार्यक्रम गर्दैछ ।
हिजो संघीय सांसदहरुका लागि अभिमुखीकरण कार्यक्रम गरेको थियो ।
कार्यक्रम आनन्द इभेन्ट नयाँबानेश्वरमा दिउँसो १ बजे हुने नेपाली कांग्रेस केन्द्रीय कार्यालयका मुख्य सचिव कृष्णप्रसाद पौडेलले जानकारी दिए । कार्यक्रममा गठबन्धनका नेताहरुले सम्बोधन गर्नेछन् ।
फागुन २५ गते हुने राष्ट्रपति निर्वाचनका लागि गठबन्धनको तर्फबाट नेपाली कांग्रेसका नेता पौडेल र नेकपा एमालेका उपाध्यक्ष सुवास नेम्वाङ उम्मेदवार छन् । पौडेललाई विजयी गराउन भन्दै गठबन्धनका नेताहरुले नेपाली कांग्रेसका उपसभापति पूर्णबहादुर खड्काको संयोजकत्वमा अन्य ७ राजनीतिक दलका प्रतिनिधिहरु सम्मिलित ‘राष्ट्रपति निर्वाचन अभियान परिचालन र संयोजन संयन्त्र’ गठन गरेका छन् ।
राष्ट्रपतिको निर्वाचनमा संघीय सांसद र प्रदेश सांसदहरु मतदाता हुने भएकाले मत क्रस नहोस् भनेर दलहरुले अभिमुखीकरण गर्न लागेका हुन् ।
