फागुण ६ काठमाण्डौँ । एमाले भित्र बसेर राजतन्त्रको वकालत गरेको भन्दै विवादमा परेका केन्द्रीय सदस्य दुर्गा प्रसाईलाई कार्बाही गर्न एमाले प्रदेश १ कमिटिले सिफारिस गरेको छ ।
शुक्रबार बसेको एमाले प्रदेश कमिटीको बैठकले मेडिकल व्यवसायी रहेका प्रसाईंले पार्टीको नीति, सिद्धान्त विपरीत गतिविधि गरेको भन्दै उनलाई पार्टीबाट निकाल्न केन्द्रसँग माग गरेको हो।
एमाले केन्द्रीय सदस्य प्रसाईंले यही फागुन १ गते पूर्वराजा ज्ञानेन्द्र शाह तथा उनका छोरा पारसलाई सहभागी गराई मेचीनगर–६ मा ‘नागरिक बचाउ महाअभियान’को उद्घाटन गरेका थिए। कार्यक्रममा पूर्वराजा शाह पुग्दा सहभागीहरूले जयजयकार गरेका थिए। कार्यक्रममा पूर्वराजासँगै पूर्वरानी कोमल शाह, पूर्वराजकुमार पारस, पूर्वराजकुमारी शिताष्म शाह सहभागी भएका थिए।
त्यसयता प्रसाईं विवादमा परेका हुन्।
राजाको पक्षमा खुलेर उभिएका प्रसाईलाई एमाले अध्यक्ष केपी ओलीले कुनै प्रतिकृया दिएका छैनन् ।
