माघ २६ काठमाडौं । सुदूरपश्चिमका मुख्यमन्त्री राजेन्द्रसिंह रावलले प्रदेश सभामा विश्वासको मत लिन बोलाएको बैठक ४ घण्टा पछि सरेको छ । नाउपाले ठोस निर्णय नगर्दा सरकारको संकट अझै टरेको छैन । निर्णायक नाउपाले रेशम चौधरीको रिहाईको माग गर्दै विस्वासको मत दिन आनाकानी गर्दा सरकार संकटमा परेको हो ।
मुख्यमन्त्री रावलले विश्वासको मत लिने अन्तिम दिनपनि निर्णायक रहेको नागरिक उन्मुक्ति पार्टीसँग सहमति जुट्न नसकेपछि दिउँसो १ बजे बोलाइएको प्रदेशसभा बैठक साँझ ५ बजे बस्ने बस्नेगरि सारिएको हो ।
मुख्यमन्त्री रावलले विश्वासको मत पाउन नसक्ने अवस्था आएपछि बुधबार बस्दै नबसी प्रदेशसभा बैठक स्थगित गरिएको थियो ।
विश्वासको मतको लागि निर्णायक नागरिक उन्मुक्ति पार्टीका ७ जना सांसद केही दिनअघिदेखि काठमाडौंमा वार्ता र छलफल गरिरहेका छन् ।
बुधबार एमाले अध्यक्ष केपी शर्मा ओलीसँग छलफल गरेका उनीहरूले बिहीबार बिहान पनि छलफल गरेका थिए ।
सदुरपश्चिम प्रदेशमा सत्तागठबन्धनको निर्णायक घटक नागरिक उन्मुक्ति पार्टीले जेलमा रहेका रेशम चौधरीलगायत टीकापुर घटनामा जोडिएकाहरूलाई रिहाइ गर्नुपर्नेलगायत माग राख्दै आएको छ ।
