पुष २४ काठमाण्डौँ । नेपाल समाजवादी पार्टीको राजनीतिक समितिको बैठक आज बस्दै छ। पार्टीको केन्द्रीय कार्यालय सुविधानगर, तीनकुनेमा बिहान ११ बजेदेखि बस्ने बैठकले माओवादी केन्द्रसँग एकताका लागि वार्ता समिति बनाउनेछ ।
समाजवादी धारको नेतृत्व गर्ने गरि विचार र सिद्धान्त मिल्ने दलहरूसँगको एकता प्रक्रियालाई तीव्रता दिने विषयमा बैठकमा छलफल हुने पार्टीका प्रचार विभाग प्रमुख तथा राजनीतिक समिति सदस्य विश्वदीप पाण्डेले जानकारी दिए।
समाजवादी ध्रुवीकरणको विषय, पार्टीको संगठन सुदृढीकरण, पार्टीका विभिन्न तहका सम्मेलनको विषय, चुनावको समिक्षा, समसामयिक राजनीतिक विषय, आगामी रणनिती लगायत एजेण्डाहरुमाथि पनि बैठकमा छलफल हुने सो पार्टीले जनाएको छ ।
यस अघि हिजो मात्रै पार्टी अध्यक्ष बाबुराम भट्टराईले प्रचण्डसँग भेटेर पार्टी एकता गर्ने सहमति गरेका थिए । हिजै माओवादीले बृहत वाम एकताका लागि कृष्ण बहादुर महराको नेतृत्वमा पाँच सदस्यीय वार्ता समिति बनाएको थियो ।
