काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले चीन भ्रमणमा जान लागेको आफ्नो पार्टीको टोलीलाई भ्रमणको मुख्य उद्देश्यमा केन्द्रित रहन र तोकिएको आचारसंहिता पूर्ण रूपमा पालना गर्न निर्देशन दिएका छन्।
भ्रमणको पूर्वसन्ध्यामा सभापति निवासमा आयोजना गरिएको छलफल कार्यक्रममा लामिछानेले चीन भ्रमणलाई उपलब्धिमूलक र फलदायी बनाउन भ्रमण टोलीका सदस्यहरूलाई आवश्यक मार्गनिर्देशन दिएका हुन्।
रास्वपाका मुख्य सचेतक कविन्द्र बुर्लाकोटीका अनुसार सभापति लामिछानेले चीन भ्रमणका क्रममा नेपाल-चीन सम्बन्ध, द्विपक्षीय हित तथा पार्टीको एजेन्डालाई केन्द्रमा राखेर प्रभावकारी सहभागिता जनाउन निर्देशन दिएका छन्।
चिनियाँ कम्युनिस्ट पार्टी (सिपिसी) को औपचारिक निमन्त्रणामा रास्वपा महामन्त्री विपिन आचार्यको नेतृत्वमा २० सदस्यीय उच्चस्तरीय प्रतिनिधिमण्डल यही कात्तिक २९ गते चीनतर्फ प्रस्थान गर्दैछ।
भ्रमण टोलीमा महामन्त्री आचार्यसहित सांसदहरू गणेश पराजुली, हरि ढकाल, मुख्य सचेतक कविन्द्र बुर्लाकोटी, लिमा अधिकारी आचार्य, समीक्षा बास्कोटा, सागर ढकाल, सुशान्त वैदिक, रिमा विश्वकर्मा, रमेशकुमार सापकोटा, डा. धनञ्जय रेग्मी, गजला शमिम मिकरानी, श्रीराम न्यौपाने, डा. राम लामा, पुनमकुमारी अग्रवाल, डा. आनन्दबहादुर चन्द, डा. सुजाता तामाङ, पुष्पाकुमारी चौधरी, अरविन्द शाह र रत्ना थापा सहभागी रहेका छन्।
टोलीले भ्रमणका क्रममा चीनका विभिन्न पर्यटकीय, राजनीतिक तथा विकास निर्माणका क्षेत्रहरूको अवलोकन गर्नुका साथै सिपिसीका नेताहरूसँग द्विपक्षीय छलफल गर्ने कार्यक्रम रहेको छ।
