काठमाडौं । नेकपा एकीकृत समाजवादीका पोलिटब्युरो सदस्यहरुले बामपन्थी शक्तिहरुबीचमा एकता गर्नुपर्नेमा जोड दिएका छन् ।
सोमबारबाट सुरु भएको पार्टीको पोलिटब्युरो बैठकमा आफ्नो धारणा राख्दै पोलिटब्युरो सदस्यहरुले बामपन्थी शक्तिहरुका बिचमा एकता गर्नुपर्नेमा जोड दिएका हुन् ।
बैठकपछि सञ्चारकर्मीहरुसँग कुराकानी गर्दै एकीकृत समाजवादीका प्रवक्ता जगन्नाथ खतिवडाले बैठकमा बोल्ने सदस्यहरुले बामपन्थीहरुलाई एकतावद्ध बनाउन पहल गर्नुपर्ने धारणा राखेको जानकारी दिए ।
खतिवडाले बामपन्थीहरुको एकताको सम्बन्धमा सबैको एकमत रहेको बताए ।
अहिलेको वर्तमान सरकारमा जाने सन्दर्भमा औपचारिक प्रस्ताव नै नआएको भन्दै यस सम्बन्धमा छलफल नभएको दावी गरे ।
प्रवक्ता खतिवडाले विगतमा सँगै गठबन्धन गरेका नेता पुष्पकमल दाहाल प्रधानमन्त्री भएसँगै आफूहरुलाई समर्थन गर्ने कि नगर्ने भन्ने सम्बन्धमा धर्मसंकट परेको स्पष्ट पारे ।
व्यक्तिगत रुपमा प्रधानमन्त्री दाहालप्रति सद्भाव भएपनि राजनीतिमा व्यक्तिगत सद्भावले काम नगर्ने खतिवडाको जिकिर छ ।
पोलिटब्युरो बैठक भोली पनि जारी रहनेछ ।
