पुस १६, पोखरा । पोखरा अन्तर्राष्ट्रिय विमानस्थल आइतबारबाट सञ्चालनमा आउने भएको छ । आन्तरिक उडान आइतबारबाटै सुरु हुने भए पनि अन्तर्राष्ट्रिय उडान भने पछाडि धकेलिएको छ ।
पोखराबाट भारतको बनारसमा पहिलो अन्तर्राष्ट्रिय उडान भर्न बुद्ध एयरले प्रक्रिया अगाडि बढाएको थियो । आइतबार ‘डेमोन्स्ट्रेसन’ उडान र मार्चदेखि नियमित उडान भर्ने बुद्ध एयरको योजना रहेपनि भारतीय पक्षबाट अनुमति नमिल्दा हाललाई अन्तर्राष्ट्रिय उडान धकेलिएको हो ।
बुद्ध एयरका प्रवक्ता दीपेन्द्र कर्णका अनुसार अन्तर्राष्ट्रिय उडान अनुमतिका लागि कम्पनीले दुई साता अघि नागरिक उड्डयन प्राधिकरणमा निवेदन बुझाएको थियो । प्राधिकरणले परराष्ट्र मन्त्रालयमार्फत भारतीय पक्षलाई पत्राचार गरेको थियो। पहिलो प्राथमिकता अन्तर्राष्ट्रिय उडानतर्फ नै रहेपनि स्वीकृति नआइ सुरु गर्न नमिलेको बताए ।
विमानस्थलको आइतबार प्रधानमन्त्री पुष्पकमल दाहालले उद्घाटन गर्नेछन् । पहिलो उडान हिमालय एयरलायन्सले एयरबस –३२० मार्फत पहिलो डेमो गर्ने भएको छ ।
उनका अनुसार विमानस्थलको क्षमताअनुसार हिमालय एयरलाइन्सको एयरबस ३२० जहाज भने आइतबार काठमाडौंबाट पोखरा आउने भएको छ । आइतबार बिहान ७ बजे केही मिनेटको फरकमा बुद्ध र यति एयरलाइन्सका जहाज नवनिर्मित विमानस्थलमा ओर्लने छन् । प्राधिकरण र पोखराका पर्यटनसँग सम्बन्धित संघ संस्थाले ती जहाजबाट आउने यात्रु र चालक दललाई स्वागत गर्ने छन् । बिहान ११ बजे प्रधानमन्त्री दाहालले विमानस्थलको औपचारिक उद्घाटन गर्ने छन् । विभिन्न जातजातिको झाँकी र्याली विमानस्थलमा हुने छ ।
पोखरा पर्यटन परिषद्का अध्यक्ष पोमनारायण श्रेष्ठले नयाँ विमानस्थलबाट पहिलो उडान अन्तर्राष्ट्रिय होस् भन्ने व्यवसायीले चाहँदाचाहँदै पनि प्रयास सफल हुन नसकेको बताए ।
नयाँ विमानस्थलबाट बुद्ध, यति, गुण, सौर्य र श्री एयरलाइन्सले दैनिक उडान भर्ने छन् । विमानस्थल हाल दिउँसो मात्रै सञ्चालन हुने छ । फेब्रुअरीबाट भने राति पनि सञ्चालनमा आउने छ । पुरानो विमानस्थलबाट केही समय जोमसोम चल्ने साना जहाज, हेलिकोप्टर र अल्ट्रालाइट सञ्चालन हुने छन् ।
