मंसीर १३ काठमाडौं । थापाथलीस्थित बागमती नदी किनारका सुकुमबासीहरूले आफूहरुलाई वैकल्पिक व्यवस्था विना हटाउन खोजेको भन्दै काठमाण्डौँ महानगरका प्रमुख बालेन शाह बिरुद्ध प्रदर्शन गरेका छन् ।
संँयौको संख्यामा भेला भएका सुकुम्वासीहरुले सुकुमबासी बस्तीबाट महानगरपालिकाले बलपूर्वक हटाउन लागेकोमा विरोध प्रदर्शन गरेका हुन् । महानगरपालिकाले सोमवार सुकुमबासी वस्ती हटाउनका लागि डोजर लिएर गएपछि सो क्षेत्र झडप भएको थियो । सुकुम्वासीहरु घरेलु हात हतियार सहित प्रतिकारमा उत्रिएका थिए ।
नाराबाजीसहित महानगरपालिका पुगेका सुकुमबासीहरुले महानगरपालिकाका प्रमुख बालेन्द्र साह बिरुद्ध नाराबाजी गरेका थिए ।
‘भूमिहीन, सुकुमबासी, अव्यवस्थित बसोवासी र स्ववासीका घर, टहरा जबरजस्ती हटाउनका लागि प्रकाशित सूचनाको बिरुद्ध वृहत् खबरदारी र्याली’ नाम दिइएको विरोध प्रदर्शनमा निधारमा कालोपट्टि बाँधेर प्रदर्शनकारी उपस्थित भएका थिए ।
सकुम्वासीको प्रतिकार र विरोधका कारण महानगरले नदी किनाराका बस्ती हटाउन सकेको छैन ।
