मंसिर ६, चितवन । चीतवनका तीन वटै निर्वाचन क्षेत्रमा सत्तारूढ गठबन्धन र एमालेका उम्मेदवार पछाडी परेका छन् ।
दुई वटामा राष्ट्रिय स्वतन्त्र पार्टी र एकमा राप्रपाका उम्मेदवारको अग्रता छ । हालसम्म सत्तारूढ गठबन्धनका उम्मेदवार चितवनका सबै निर्वचान क्षेत्रमा तेस्रो स्थानमा छन् ।
राष्ट्रिय स्वतन्त्र पार्टीका उम्मेदवार दुई क्षेत्रमा अगाडि र एक क्षेत्रमा दोस्रो स्थानमा छन् । चितवन १ मा राष्ट्रिय स्वतन्त्र पार्टीका हरि ढकाल ६ हजार ३६७ मतका साथ अगाडि छन् । त्यहाँ एमालेका उम्मेदवार सुरेन्द्र पाण्डेको पाँच हजार ३९९ र सत्तारूढ गठबन्धनबाट नेपाली कांग्रेसका विश्वनाथ पौडेलको पाँच हजार २९५ मत छ ।
यस्तै चितवन २ मा राष्ट्रिय स्वतन्त्र पार्टीका केन्द्रीय सभापति रवि लामिछानेले चार हजार सात मतले अग्रता लिएका छन् । त्यहा एमालेका कृष्णभक्त पोखरेलले तीन हजार ८७९ मत ल्याएका छन् भने सत्तारूढ गठबन्धनबाट कांग्रेसका उम्मेद्वार रहेका उमेश श्रेष्ठको तीन हजार ४१० मत आएको छ । चितवन २ मा कालिका नगरपालिकाको मत गणना सुरू भएपछि रवि लामिछाने अग्रता बढाउदै लगेका हुन् ।
यस्तै चितवन ३ मा राष्ट्रिय प्रजातन्त्र पार्टीका विक्रम पाण्डे चार हजार ७७० मत ल्याएर अगाडि छन् । दास्रो स्थानमा राष्ट्रिय स्वतन्त्र पार्टीकी जिता बराल छन् । उनको तीन हजार ९७७ मत आएको छ । सत्तारूढ गठबन्धनबाट उम्मेद्वार रहेका माओवादी केन्द्रका डा.भोजराज अधिकारीको तीन हजार ८२५ मत छ । एमालेले समर्थन गरेको स्वतन्त्र उम्मेद्वार दिनेश कोइरलाको तीन हजार १७३ मत छ । कांग्रेस केन्द्रीय सदस्य रहेका कोइरला पार्टी निर्णय विरूद्ध उम्मेदवार भएका हुन् । स्वतन्त्र उठेका कांग्रेसका अर्का पुराना नेता जगन्नाथ पौडेलको ११७ मत आएको छ ।
