एजेन्सी, १७ चैत । रुसले युक्रेनको युद्धग्रस्त दक्षिणी शहर मारियोपोलमा युद्ध विराम घोषणा गरेको छ ।
युद्धले क्षतविक्षत अवस्थामा रहेको शहरमा फसेका सर्वसाधारणको उद्धारका लागि भन्दै रुसले युद्धविराम घोषणा गरेको अन्तराष्ट्यि सन्चारमाध्यमले जनाएका छन् । साथै रुसले मारियोपोलबाट सर्वसाधारणको उद्धार तथा पुनर्स्थापना गर्न राष्ट्रसंघ र रेडक्रसलाई आग्रह समेत गरेको छ ।
उक्त शहरमा मात्रै ५ हजार सर्वसाधारणको ज्यान गएको अनुमान छ भने हजारौं त्यहाँबाट भागेका छन् ।
दक्षिणी बन्दरगाह शहर भएकाले रुसले सुरूदेखि नै उक्त शहरलाई लक्षित गरी आक्रमण तीब्र बनाएको थियो । रुसले मारियोपोल शहरले घुँडा नटेकेसम्म त्यहाँबाट नहट्ने बताईसकेको छ भने युक्रेनले त्यसो नगर्ने दृढता ब्यक्त गरेको छ ।
यसैबीच, अमेरिकी राष्ट्रपति कार्यालय ह्वाइटहाउसले रुसी सेनाले युक्रेन युद्धबारे राष्ट्रपति भ्लादिमिर पुटिनलाई गलत सूचना दिएको दाबी गरेको छ ।
