कश्मिरका पृथकतावादी नेता सइद अली गिलानीको निधन भएको छ । ९२ वर्षको उमेरमा उनको बिहीबार श्रीनगरस्थित आफ्नै घरमा निधन भएको हो । उनी लामो समयदेखि बिरामी थिए ।
गिलानीको मृत्युपछि सम्भावित हिंसालाई मध्यनजर राख्दै कश्मिरको मुख्य सहर श्रीनगरका सडकमा सुरक्षा व्यवस्था कडा पारिएको छ । प्रहरीले गिलानीको घरनजिकको सडकमा काँडेतार र अवरोध राखेको छ । भारतले कास्मीरमा ईन्टरनेट सेवा समेत बन्द गरेको छ ।
पाकिस्तानले गिलानीको मृत्युप्रति शोक व्यक्त गरेको छ । प्रधानमन्त्री इमरान खानले गिलानीलाई ‘स्वतन्त्रताका योद्धा’ भन्दै उनको मृत्युबाट पाकिस्तान सरकार दुःखी भएको बताएका छन् । गिलानीले आफ्नो सम्पूर्ण जीवन जनता र उनीहरुको अधिकारका लागि लडेको खानले उल्लेख गरेका छन् ।
गिलानीले करिब १० वर्ष जेल जीवन बिताएका थिए । जमात(आई(इस्लामी पार्टीको तर्फबाट उनी भारत प्रशासित कश्मिरमा १५ वर्षसम्म विधान सभा सदस्य बने । प्रधानमन्त्री नरेन्द्र मोदी नेतृत्वको सरकारले सन् २०१९ मा जमात(आई(इस्लामीमाथि प्रतिबन्ध लगाएको थियो ।
गिलानीले झन्डै दुई दर्जन विखण्डनकारी पार्टीहरुको छाता संगठन अल पार्टिज हुरियत कन्फरेन्सको नेतृत्व गरेका थिए । उनले कश्मिरबारे हुने जुनसुकै वार्ताको विरोध गर्थे ।
भारत र पाकिस्तानले मुसलमानहरुको बाहुल्यता रहेको कश्मिरलाई आ–आफ्नो दाबी गर्दै आएका छन् । पृथकतावादी आन्दोलनका कारण भारत प्रशासित कश्मिर विगत तीन दशकदेखि अशान्त छ ।
