९ असार, एजेन्सी । पश्चिमी अफ्रिकी मुलुक बुर्किना फासोमा रहेको एक चौकीमा विद्रोहीले आक्रमण गर्दा ११ जना प्रहरीको मृत्यु भएको छ ।
राहत वितरणका क्रममा हतियारधारी समूहले चौकीमा अक्रमण गर्दा ती प्रहरीको मृत्यु भएको अमेरिकी विदेश मन्त्रालयले विज्ञप्ति जारी गरेर जनाएको छ ।
आक्रमणको कुनै पनि समूहले जिम्मा नलिएपनि विद्रोहीको खोजी भइरहेको त्यहाँको सरकारले जनाएको अन्तर्राष्ट्रिय समाचार संस्थाहरुले जनाएका छन् । सन् २०१५ पछि बुर्किना फासोले अल–कायदा र आईएसआईएलसँग सम्बन्धित विद्रोही लडाकूहरुको सामना गरिरहेको छ ।
सो आक्रमणमा हालसम्म एक हजार चार सय भन्दा बढीको मृत्यु भइसकेको अधिकारीहरुले जनाएका छन् । विद्रोहीको निरन्तरको आक्रमणका कारण मालीको सीमा नजिकै मानविय संकट उत्पन्न भएको भन्दै दातृ निकायहरुले चिन्ता व्यक्त गरेका छन् ।
विद्रोहीको लगातारको आक्रमणका कारण कयौ सर्वसाधारण विस्थापित भएको समाचारमा जनाइएको छ ।
विद्रोहीको हिंसात्मक आक्रमणका कारण विस्थापित हुनुहरुमध्ये करिब ८४ प्रतिशत महिला तथा बालबालिका रहेको बताइएको छ ।
