बैशाख ८ एजेन्सी । अफ्रिकी मुलुक चाडका राष्ट्रपति इद्रिस डेबी विद्रोहीसंगको भिडन्तमा मारिएका छन् ।
लिवियासँगको सीमा जोडिएको उत्तरी क्षेत्रमा सेना र विद्रोहीबीच भएको भिडन्तमा राष्ट्रपति डेबी मारिएका हुन् ।
राष्ट्रपतिको निधनसंगै सरकार र संसद विघटन गरिएको छ । सैन्य परिषद्ले आगामी १८ महिनासम्म मुलुकको नेतृत्व गर्ने जनाइएको छ । राष्ट्रपति डेबी गत सप्ताहन्त लिवियासंगको सीमा नजिकको क्षेत्रमा सेनाले विद्रोहीसंग संघर्ष गरिरहेको बेसमा पुगेका थिए ।
सोही समयमा बोर्डर पोष्टमा विद्रोहीले आक्रमण गरेका थिए । शनिवारबाट शुरु भएको भिडन्तमा ३ सय जना विद्रोही र १ सय ५० जना पक्राउ परेका छन् ।
सेनाका जर्नेलले भिडन्तमा पाँच जना सेनाको मृत्यु र ३६ जना घाईते भएको बताएका छन् ।
अप्रिल ११ मा भएको प्रान्तिय निर्वाचनमा डेबीले ८० प्रतिशत मत हासिल गर्दै छैटौ कार्यकालका लागि पनि निर्वाचित हुने प्रक्षेपण गरिएको थियो । अफ्रिकामा सबैभन्दा लामो समय सत्तामा रहेका डेबी सन् १९९० मा सत्तामा आएका थिए ।
