फागुण १६ एजेन्सी । म्यानमारमा सेनाले कु गरे पछि निरन्तर आन्दोलनमा उत्रिएका प्रदर्शनकारीमाथि व्यापक दमन शुरु गरेको छ ।
आज भएको बिशाल प्रदर्शनमा सेना सहित सुरक्षाफौजले गोली चलाउदा कम्तीमा सात जनाको मृत्यु भएको बताईएको छ ।
सुरक्षा बलले सिधै प्रदर्शनकारीमाथि गोली चलाएको बिबिसीले जनाएको छ । यसै गरी अश्रुग्यास, पानीको फोहरा, रबरको गोली पनि व्यापक मात्रामा प्रहार भएको समाचारमा उल्लेख छ ।
प्रदर्शन दबाउन सेना नै मैदानमा उत्रिए पछि तनावग्रस्त बनेको थियो । सेनाको गोलीबाट अन्य दर्जनौ नागरिक घाईते भएका छन् ।
नेतृ आङ सान सू चीलाई रिहा गर्न र सत्ता फिर्ता गर्न माग गर्दै सेनाविरुद्ध हरेक दिन प्रदर्शन हुँदैआएको छ । म्यानमारको ठूला सहर रंगुन सहित विभिन्न सहरमा हरेक दिन विशाल जनप्रदर्शन भएका छन् । जनताको शान्तिपूर्ण प्रदर्शन दबाउन सेना अचानक आक्रामक बन्न थालेको छ ।
पहिल्यै २० वर्ष नजरबन्दमा बसेकी सुचीलाई सेनाले पुनः नजरबन्दमा राखेपछि संसारभरबाट त्यसको आलोचना हुँदै आएको छ ।
अन्तराष्ट्रिय समुदायको दबाबका बीच पनि म्यानमारमा सेनाले गरेको कु फिर्ता भएको छैन ।
