१४ पुष, एजेन्सी । कोरोना भाइरसको महामारीबाट प्रभावित भएका अमेरिकी नागरिकले फेरि दुई हजार डलर राहतका रुपमा पाउने भएका छन् ।
अमेरिकाको तल्लो सदन हाउस अफ रिप्रिजेनटेटिभले कोरोनाबाट प्रभावित नागरिकलाई दुई हजार डलर रकम प्रदान गर्ने प्रस्तावमा सहमति जनाएको हो ।
डेमोक्र्याटको बहुमत रहेको तल्लो सदन (२७५–१३४) ले राहत रकम ६ सयबाट दुई हजार बनाउने व्यवस्था पारित गरेको हो ।
राहत प्याकेज सम्बन्धी विधेयकमा हस्ताक्षर गर्न अस्वीकार गरेका राष्ट्रपति डोनाल्ड ट्रम्पले आइतबार बल्ल हस्ताक्षर गर्नुभएको थियो । तर डेमोक्रेट बहुल तल्लो सदनले ट्रम्पकै माग बमोजिम राहतलाई दुई हजार बनाउन सहमति दिएको हो ।
यससम्बन्धमा अन्तिम निर्णय भने ट्रम्पकै पार्टी रिपब्लिकनको नियन्त्रणमा रहेको माथिल्लो सदन सिनेट गर्नेछ ।
राहत रकम बढाउने प्रस्तावको विपक्षमा १३० रिपब्लिकन, दुई स्वतन्त्र र दुई डेमोक्र्याट रहेका थिए ।
अमेरिकाले कोरोना भाइरसका कारण अवसर गुमाएकाहरुलाई राहत रकम तिरण गर्दै आएको छ ।
