काठमाडौँ कार्तिक २८ । चीनले ढिलो गरी भए पनि अमेरीकी राष्ट्रपतिमा निर्वाचित जो बाईडेनलाई बधाई दिएको छ । यस अघि चीन, रुस, मेक्सिको लगायतका देशले बाईडेनलाई बधाई नदिएकोमा अनेक अड्कल काटिएको थियो ।
चिनियाँ विदेश मन्त्रालयका प्रवक्ता वाङ वेनबिनले आज प्रेस कन्फेरेन्समा राष्ट्रपतिमा निर्वाचित जो बाइडेन र उपराष्ट्रपतिमा निर्वाचित कमला ह्यारिसलाई बधाई दिएका हुन् ।
प्रवक्ता वाङले आफूहरु अमेरीकी नागरिकको छनौटलाई सम्मान गर्ने पनि बताएका छन् ।
अहिलेसम्म बाइडेनले २९० इलेक्टोरल भोट पाएका छन् भने ट्रम्पले २१७ भोट पाएका छन् । अमेरिकाको राष्ट्रपतिमा निर्वाचित हुन २७० इलेक्टोरल भोट आवश्यक पर्छ ।
शनिबार जो बाइडेनलाई आधिकारिक रुपमा अमेरिकाको राष्ट्रपतिमा निर्वाचित भएको घोषणाको तयारी भएको छ । तर अहिले सम्म राष्ट्रपति ट्रम्पले निर्वाचन हारेको स्वीकार गरीसकेका छैनन् ।
