एजेन्सी भदौ १३ । शुरुमा भारत र पाकिस्तानमा संक्रमण दर र संख्या उस्तै उस्तै रहे पनि अहिले पाकिस्तानले कोरोनामाथि लगभग नियन्त्रण गरेको छ ।
दैनिक ६ हजार सम्म संक्रमित थपिएर कोरोना अनियन्त्रित भएको स्थितिलाई सम्हाल्ने पाकिस्तानले अहिले संक्रमण न्युन स्तरमा झारेको छ ।
अहिले पाकिस्तानमा दैनिक ४ सयको हाराहारीमा संक्रमित थपिरहेका छन् । र मृत्युदर पनि उल्लेख्य छैन ।
यसै समयमा पाकिस्तानका प्रधानमन्त्री ईमरान खानले अब १५ सेप्टेम्बरबाट स्कुल कलेज खोल्ने घोषणा गरेका छन् ।
साथै पाकिस्तानले पर्यटकीय क्षेत्र र आन्तरीक उडान समेत निर्देशिका बनाएर खोल्ने तयारी गरेको छ ।
पाकिस्तानले शुरु देखि नै पूर्ण प्रतिवन्धात्मक स्थितिको लकडाउन गरेन । अहिले सामाजिक दुरी, परीक्षण , मास्क जस्ता कुरालाई मापदण्ड बनाएर माईक्रो स्मार्ट लकडाउन खानले लागू गराएका छन् ।
पाकिस्तानले कोरोना नियन्त्रणमा लिएको विधिलाई विल गेट्सले समेत दुर्लभ सफलता भनेका छन् ।
यता भारतमा भने निरन्तर कोरोना संक्रमित थपिने क्रम बढेको छ । भारतमा दैनिक ७५ देखि ७६ हजार सम्म मानिस संक्रमित भईरहेका छन् भने मृतकको संख्या पनि ६२ हजार नाघेको छ । वोर्ड परीक्षा रोक्न माग गर्दै भारतमा भने विद्यार्थीहरु नै सडकमा उत्रिएका छन् ।
भारतमा पछिल्लो विवरण अनुसार ३४ लाख ६८ हजार संक्रमितको संख्या रहेको छ भने पाकिस्तानमा २ लाख ९५ हजार बढी संक्रमित छन् । त्याहाँ ६ हजार २ सय बढीको मृत्यु भएको छ ।
