भदौ ११ काठमाण्डौं । सरकारले कोरोना ब्यापक मात्रामा बढीरहेको भारतमा नियमित तथा चार्टर दुबै उडान नगर्ने भएको छ । भदौ १६ पछि शसर्त नियमित र चार्टर उडान गर्ने भनेर सार्वजनिक गरीसकेको छ ।
संस्कृति पर्यटन तथा नागरिक उड्डयन मन्त्रालयले सार्वजनिक गरेको भदौ १६ देखिको चार्टर्ड तथा नियमित उडान तालिकामा भारतको कुनै पनि गन्तव्य तोकिएको छैन ।
नेपालमा लकडाउन सुरु हुनुअघि नेपाल वायुसेवा निगमले मात्रै दिल्लीमा साताको १४, बैंगलोर र मुम्बईमा साताको ३–३ उडान भर्दै आएको थियो ।
भारत सरकारले हाललाई उडान अनुमति नदिएको, सबै विमान कम्पनीले गरेर दैनिक पाँच सय मात्रै नेपाली ल्याउन अनुमति भएको र भारतमा रहेका नेपालीहरू सडकमार्गबाट समेत आउन सक्ने भएकाले यसपटकको नियमित र चार्टर्ड उडानमा भारतलाई नसमेटिएको बताईएको छ ।
सरकारले पिसिआर परीक्षण सहज भएका मुलुकबाट नियमित र असहज भएका मुलुकबाट चार्टर्ड उडान गर्ने भने भारतबाट तत्काल नगर्ने भएको हो ।
हाल पर्यटन मन्त्रालयले स्वीकृत गरेको उडान तालिका अनुसार भदौ १६ देखि असोज १४ सम्म ६० वटा नियमित उडान हुनेछ । उक्त एक महिनामा २७ वटा चार्टर्ड उडान हुनेछन् ।
भारतबाट नेपालीलाई आउन १० वटा नाका खुल्ला गरिएको छ ।
