एजेन्सी जेष्ठ १९ । अर्मेनियाका प्रधानमन्त्री निकोल पासीनियनलाई कोरोना संक्रमण भएको छ । साथै उनका परिवारका सदस्यहरु समेत संक्रमित भएका छन् ।
देश भित्रै एउटा सेन्य अड्डाको भ्रमणमा जानु अघि परीक्षण गर्ने क्रममा आफू संक्रमित भएको पाईएको निकोलले सामाजिक सञ्जालमार्फत सार्वजनिक गरेका छन् ।
उनले यस अघि आफुमा कुनै लक्षण नदेखिए पनि परीक्षण गराएको भन्दै अब होम आईसोलेसनमा बसेर काम गर्ने पनि बताएका छन् ।
उनले केही दिन अघि भएको एउटा बैठकमा वेटरले सुरक्षा उपकरण प्रयोग नगरी एक गिलास पानी दिएको स्मरण गर्दै त्यही बैठकका क्रममा संक्रमण भएको हुन सक्ने अनुमान गरेका छन् । उनलाई एक गिलास पानी दिने वेटर पछि संक्रमित पाईएको थियो । उनका परिवारका अन्य सदस्य समेत संक्रमित भएका छन् ।
३० लाख जनसंख्या भएको आर्मेनियामा ९ हजार बढी कोरोना संक्रमित पुगेका छन् भने १ सय ३० जनाको मृत्यु भईसकेको छ ।
