चैत्र २८ काठमाण्डौं । पाकिस्तानले कोरोना महामारीविरुद्ध जुध्न घोषणा गरिएको एसियाली सहयोग संगठन (सार्क) कोभिड–१९ आपत्कालीन कोषमा तीस लाख डलर दिने घोषणा गरेको छ ।
गत १५ मार्चमा सार्क सदस्य राष्ट्रका प्रमुख र उच्च अधिकारीहरुबीच भएको भिडियो कन्फरेन्समा उक्त कोषको घोषणा गरिएको थियो।
मोदीले सोही भिडियो कन्फरेन्समा भारतका तर्फबाट कोषमा एक करोड अमेरिकी डलर दिने घोषणासमेत गरेका थिए। पछि उक्त कोषमा नेपाललगायतका अन्य सार्क मुलुकहरुले पनि सहयोगको घोषणा गरे। नेपालले भने दश लाख डलर दिने घोषणा गरेको छ। पाकिस्तानी विदेश मन्त्रालयले बिहीबार एक विज्ञप्ति जारी गर्दै कोषमा रकम दिने सम्बन्धमा सार्क सचिवालयलाई जानकारी गराइएको जनाएको छ। सार्क सचिवालय काठमाडौंमा छ।
पाकिस्तानले आपत्कालीन कोषमा तीस लाख डलर सहयोग गर्ने घोषणासँगै कोषको परिचालन सार्क सचिवालयबाटै हुनपर्ने आफ्नो पुरानो अडान पनि दोहोऱ्याएको छ। साथै सार्क महासचिव इसाला रुवान विराकुनसँग बिहीबार नै भएको टेलिफोन कुराकानीमा पनि पाकिस्तान विदेश सचिव सोहेल महमुदले यही धारणा दोहोऱ्याएको समेत विज्ञप्तिमा उल्लेख छ।
